الشيلاك والجيلش من البيت توفير الوقت والمال

الشيلاك والجيلش من البيت توفير الوقت والمال

مرحبا جميعا، كيف حالكم ان شالله كلكم بخير وسعادة

😍راح أفتتح المدونة اليوم بموضوع عن أكثر الأشياء اللي أحب

 أسويها وهي أظافري

أولا، ايش الشيلاك و الجيلش؟

 

هي نوعية من أنواع المناكير اللي يكون شكلها مثل أظافر الجيل لكنها مو تركيب وتنشال بمزيل مناكير خاص فيها، أنا أخترت

 الشيلاك والجيلش في العنوان لأنهم أكثر ماركتين مشهورة، لكن

  في شركات كثير غيرهم بنفس الفكرة

هل تحتاج الشيلاك والجيلش لجهاز خاص؟

نعم لازم جهاز خاص فيهم، الشيلاك والجيلش كل واحد فيهم عنده جهاز خاص باسمهم لكن أسعارها تعتبر عالية وفيه أجهزة أرخص منهم بكثير وتؤدي الغرض والجهاز الموجود في هالموضوع سعره مناسب جدا ويؤدي الغرض

هل فيه صالونات تقدم هالخدمة؟

متوفرة في الرياض وجربتها لكن كل اللي جربتهم شيلاك، لكن سعر الخدمة مرتفع اللون لليدين يتراوح من 100 إلى 200 ونفس السعر للقدمين بدون بين البديكير والمنكير فإذا كنتي تحبين هالنوع وتسوينه باستمرار راح يكون اقتنائك للجهاز وأدواته توفير على المدى الطويل ولاننسى أنه ممكن تستخدمينه في أي وقت يناسبك بدون حجز موعد ولا مشوار 💓💕 سعادة

ماهي الأدوات اللي نحتاجها؟

 

لتثبيت اللون نحتاج جهاز ضوء

طبقة أساسية- بيس كوت

لون

طبقة نهائية- توب كوت

مامميزات الشيلاك والجيلش عن المناكير العادية؟

أولا المقاومة، المفترض تعيش لمدة توصل أسبوعين بدون أي تشققات، لكن بالنسبة لي أحلى شي فيها لمعتها وشكلها على الأظافر، اللمعة بعد أسبوع هي نفسها لمعة أول يوم شي جميل جدا

اقدر اخلي الشيلاك والجيلش اكثر من أسبوعين؟

ماقد جربت، عادة أخليها أسبوع تقريبا وأشيلها لكن سمعت كثير جربوها لمدة ثلاث أسابيع، لكن عموما الأظافر تنمو وراح يطلع الظفر الجديد وراح يكون شكلها مو مرتب

كيف نستخدم الشيلاك والجيلش؟

 

وأخيرا وصلنا لأهم نقطة اللي هي التطبيق أولا قبل مانبدأ لازم نهيء الأظافر بأننا نشيل الجلد الميت حول الظفر عشان مايمسك عليه اللون وينقشر من أول الأيام

أستخدم هالسائل من سالي هانسون وأحطه على الجلد حول الظفر لمدة 15 ثانية وبعدها أخذ  عود البامبو وأبدا أدفع الجلد الميت، هالخطوة تكفي معظم الأحيان لكن لو تشوفون جلد ميت واضح ممكن تستخدمون مقص الجلد الميت بس أبدا لاتبالغون في القص لأن الجلد اللي حول الظفر مهم جدا لصحته. الآن بعد ماأخلص من الجلد الميت يصير وقت تعديل شكل الظفر وبرده بالطول والشكل المناسب و ممكن نسوي هالخطوة في أي صالون

بعدها نستخدم مسحات الكحول عشان نتأكد أنه مافيه أي طبقة فوق الأظافر تمنع من ثبات اللون عليها. مهم جدا جدا بعد مانمسح الأظافر بالمسحات أنه مانسوي شي بعدها على طول نبدأ بخطوات وضع الشيلاك أو الجليش

أول شي نبدأ بطبقة الأساس، دائما طبقة رقيقة وماتطلع عن حدود الظفر لأنه إذا ثبت على الجلد أو الكيوتكلز راح تنشال المناكير بكل سهولة راح تنقشر ولاراح تتهنين فيها، بعدين نحط اليد في الجهاز لمدة 30 ثانية لو كان يو في راح يحتاج وقت أطول

نفس الخطوات نكررها مع اللون دائما اللون أحب يكون طبقتين لأني أحرص أن الطبقة تكون رقيقة عشان تتوزع بشكل مثالي ولا يكون فيه ارتفاعات في الظفر

في النهاية نستخدم التوب كوت وعلى الجهاز ِ30 ثانية، وبكذا نكون وصلنا لآخر مرحلة اللي هي تنظيف سطح الظفر لأنه راح يكون دبق، ناخذ المسحة الطبية ونمسح الظفر لاتاخافون ماراح يروح اللون

كيف أمسح اللون؟

يحتاج مزيل خاص فيه وراح اكتب مدونة تشرح طريقة أزالة الشيلاك قريبا ان شالله

 ِ

💓هذي طريقتي اللي تعلمتها وحبيت أشارككم إياها

إلى أن نلتقي في مدونة جديدة، في حفظ الرحمن

😊